ਚੰਗਾ ਹੁੰਦਾ ਜੇਕਰ ਅਮਰੀਕ ਸਿੰਘ ਨੂੰ ਵਿਦਾਇਗੀ ਉੱਤੇ ਨਵੇਂ ਸਾਇਕਲ ਨਾਲ ਹੀ ਸਨਮਾਨਿਤ ਕੀਤਾ ਜਾਂਦਾ : ਮਹਿਦੂਦਾਂ
ਲੁਧਿਆਣਾ 5 ਫਰਵਰੀ (ਹਰਸ਼ਦੀਪ ਸਿੰਘ ਮਹਿਦੂਦਾਂ) ਪੀ ਐਸ ਈ ਬੀ ਇੰਪਲਾਈਜ ਫੈਡਰੇਸ਼ਨ ਏਟਕ ਵੱਲੋਂ ਸੇਵਾ ਮੁਕਤ ਹੋਏ ਅਜਿਹੇ ਬਿਜਲੀ ਮੁਲਾਜਮ ਨੂੰ ਸਨਮਾਨਿਤ ਕੀਤਾ ਗਿਆ ਜਿਸ ਨੇ 37 ਸਾਲ ਇੱਕੋ ਸਾਇਕਲ ਉੱਤੇ ਇਮਾਨਦਾਰੀ ਨਾਲ ਅਣਥੱਕ ਸੇਵਾਵਾਂ ਦਿੱਤੀਆ। ਇਸ ਬਾਰੇ ਜਾਣਕਾਰੀ ਸਾਂਝੀ ਕਰਦਿਆਂ ਪੀ ਐਸ ਈ ਬੀ ਇੰਪਲਾਈਜ ਫੈਡਰੇਸ਼ਨ ਏਟਕ ਦੇ ਸੁੰਦਰ ਨਗਰ ਡਵੀਜ਼ਨ ਦੇ ਪ੍ਰਧਾਨ ਤੇ ਜਿਲਾ ਆਗੂ ਗੁਰਪ੍ਰੀਤ ਸਿੰਘ ਮਹਿਦੂਦਾਂ ਨੇ ਦੱਸਿਆ ਕਿ 37 ਸਾਲ ਪਹਿਲਾਂ ਬਿਜਲੀ ਬੋਰਡ ਵਿੱਚ ਡੇਲੀਵੇਜ 'ਤੇ ਭਰਤੀ ਹੋਏ ਅਮਰੀਕ ਸਿੰਘ ਨੇ ਇਮਾਨਦਾਰੀ ਨਾਲ ਅਣਥੱਕ ਸੇਵਾਵਾਂ ਦਿੱਤੀਆਂ ਤੇ ਤਰੱਕੀ ਕਰਦੇ ਹੋਏ ਉਹ ਲਾਇਨਮੈਨ ਬਣੇ। ਹੁਣ ਕਈ ਸਾਲਾਂ ਤੋਂ ਲਾਇਨਮੈਨ ਦੀਆਂ ਸੇਵਾਵਾਂ ਦੇ ਰਹੇ ਅਮਰੀਕ ਸਿੰਘ ਨੇ ਕਦੇ ਵੀ ਅਪਣੇ ਸੀਨੀਅਰਾਂ ਦਾ ਤਾਂ ਕੀ ਜੂਨੀਅਰਾਂ ਦਾ ਵੀ ਕਹਿਣਾ ਨਹੀਂ ਮੋੜਿਆ। ਸੀਨੀਅਰ ਵੱਲੋਂ ਉਸਨੂੰ ਜੋ ਵੀ ਡਿਊਟੀ ਦਿੱਤੀ ਗਈ ਉਸਨੂੰ ਲੈਕੇ ਉਸਨੇ ਕਦੇ ਵੀ ਮੱਥੇ ਵੱਟ ਨਹੀਂ ਪਾਇਆ।
ਸ੍ ਮਹਿਦੂਦਾਂ ਨੇ ਦੱਸਿਆ ਕਿ ਅਮਰੀਕ ਸਿੰਘ ਨੇ ਕਦੇ ਵੀ ਘੰਟੇ ਦੇਖ ਕੇ ਕੰਮ ਨਹੀਂ ਕੀਤਾ। ਉਹ ਸੁੰਦਰ ਨਗਰ ਡਵੀਜਨ 'ਚ ਇਕੱਲਾ ਅਜਿਹਾ ਮੁਲਾਜ਼ਮ ਹੋਵੇਗਾ ਜਿਸਨੂੰ ਜਿਸ ਵੇਲੇ ਵੀ ਡਿਊਟੀ ਉੱਤੇ ਬੁਲਾ ਲਿਆ ਗਿਆ ਉਹ ਹਾਜਰ ਹੋਇਆ ਪਰ ਅਫਸੋਸ ਕਿ ਪਤਾ ਨਹੀਂ ਸੀਨੀਅਰ ਅਧਿਕਾਰੀ ਅਜਿਹੇ ਮੇਹਨਤੀ ਮੁਲਾਜਮਾਂ ਦੀ ਚੋਣ 15 ਅਗਸਤ ਜਾਂ 26 ਜਨਵਰੀ ਵਰਗੇ ਸਰਕਾਰੀ ਸਮਾਰੋਹਾਂ 'ਚ ਵਿਸ਼ੇਸ਼ ਸਨਮਾਨ ਦੇਣ ਲਈ ਕਿਉਂ ਨਹੀਂ ਕਰਦੇ। ਸ੍ ਮਹਿਦੂਦਾਂ ਨੇ ਕਿਹਾ ਕਿ ਭਾਵੇਂ ਸਰਕਾਰੀ ਤੌਰ 'ਤੇ ਨਾ ਸਹੀ ਪਰ ਫੈਡਰੇਸ਼ਨ ਏਟਕ ਅਜਿਹੇ ਮੁਲਾਜਮਾਂ ਨੂੰ ਅਪਣੇ ਪੱਧਰ 'ਤੇ ਸਨਮਾਨ ਕਰਨ ਦੀ ਰਵਾਇਤ ਜਰੂਰ ਚਲਾਏਗੀ। ਸ੍ ਮਹਿਦੂਦਾਂ ਨੇ ਕਿਹਾ ਕਿ ਅੱਜ ਫੈਡਰੇਸ਼ਨ ਏਟਕ ਵੱਲੋਂ ਅਮਰੀਕ ਸਿੰਘ ਦੀ ਸੇਵਾ ਮੁਕਤੀ ਉੱਤੇ ਉਸਨੂੰ ਵਿਸ਼ੇਸ਼ ਸਨਮਾਨ ਚਿੰਨ ਦੇ ਕੇ ਇਸਦੀ ਨੀਂਹ ਰੱਖ ਦਿੱਤੀ ਗਈ ਹੈ।
ਉਨਾ ਏਹ ਵੀ ਕਿਹਾ ਕਿ ਜਿਸ ਪ੍ਰਕਾਰ ਅਮਰੀਕ ਸਿੰਘ ਨੇ ਅਪਣੀ ਨੌਕਰੀ ਸਾਇਕਲ ਉੱਤੇ ਹੀ ਕੀਤੀ ਸੀ ਤਾਂ ਫੈਡਰੇਸ਼ਨ ਏਟਕ ਦੀ ਇੱਛਾ ਸੀ ਕਿ ਅਮਰੀਕ ਸਿੰਘ ਨੂੰ ਸੇਵਾ ਮੁਕਤੀ ਉੱਤੇ ਸਾਇਕਲ ਭੇਟ ਕਰਕੇ ਸਨਮਾਨਿਤ ਕੀਤਾ ਜਾਂਦਾ ਪਰ ਅਫਸੋਸ ਕਿ ਉਸਦੇ ਅਜਿਹੇ ਮਾਣਮੱਤੇ ਸਾਂਝੇ ਸਨਮਾਨ ਲਈ ਕੁਝ ਲੋਕਾਂ ਨੇ ਹਾਮੀਂ ਨਹੀਂ ਭਰੀ ਜਿਸ ਕਾਰਨ ਸਾਡੀ ਏਹ ਰੀਝ ਪੂਰੀ ਨਹੀਂ ਹੋਈ। ਸਾਡਾ ਮਨੋਰਥ ਏਥੇ ਸਾਇਕਲ ਦੇਣਾ ਨਹੀਂ ਬਲਕਿ ਸਾਇਕਲ ਦੇ ਰੂਪ ਵਿੱਚ ਸਾਂਝੇ ਤੌਰ 'ਤੇ ਇੱਕ ਸਨਮਾਨ ਦੇਣਾ ਸੀ।
ਫੈਡਰੇਸ਼ਨ ਏਟਕ ਦੀ ਟੀਮ 'ਚ ਸ਼ਾਮਿਲ ਗੁਰਪ੍ਰੀਤ ਸਿੰਘ ਮਹਿਦੂਦਾਂ, ਕਰਤਾਰ ਸਿੰਘ, ਦੀਪਕ ਕੁਮਾਰ, ਹਿਰਦੇ ਰਾਮ, ਗੁਰਿੰਦਰ ਸਿੰਘ, ਅਕਾਸ਼ਦੀਪ ਤੋਂ ਇਲਾਵਾ ਜੇਈ ਨੰਦ ਸਿੰਘ, ਏਓਜੇਈ ਤੋਂ ਜੇਈ ਪਰਦੀਪ ਸਿੰਘ ਤੇ ਜੇਈ ਦਵਿੰਦਰ ਸ਼ਰਮਾ, ਏਜੇਈ ਸੰਦੀਪ ਮਰਵਾਹਾ, ਹਰਪਾਲ ਸਿੰਘ, ਰਾਮਦਾਸ, ਅਰਸ਼, ਕਾਲਾ ਵੈਲਡਿੰਗ ਵਾਲਾ, ਪਰਮਜੀਤ ਸਿੰਘ, ਮੁਖਤਿਆਰ ਸਿੰਘ ਫੌਜੀ, ਕੁਲਦੀਪ ਸਿੰਘ ਅਤੇ ਰਾਘਵ ਮਰਵਾਹਾ ਨੇ ਅਮਰੀਕ ਸਿੰਘ, ਉਸਦੀ ਪਤਨੀ ਮਨਜੀਤ ਕੌਰ, ਪੁੱਤਰ ਅਜੈ ਕੁਮਾਰ ਤੇ ਉਸਦੀ ਨਵ ਵਿਆਹੀ ਪਤਨੀ ਮਨੀਸ਼ਾ, ਛੋਟੇ ਪੁੱਤਰ ਤਜਿੰਦਰ ਸਿੰਘ ਨੂੰ ਸੇਵਾ ਮੁਕਤੀ ਤੋਂ ਬਿਨਾ ਅਜੈ ਤੇ ਮਨੀਸ਼ਾ ਦੇ ਵਿਆਹ ਦੀਆਂ ਮੁਬਾਰਕਾਂ ਦਿੱਤੀਆਂ।
ਅਮਰੀਕ ਸਿੰਘ ਅਤੇ ਉਨ੍ਹਾਂ ਦੇ ਪਰਿਵਾਰ ਨੂੰ ਅਜਿਹੀਆਂ ਹੀ ਮੁਬਾਰਕਾਂ ਸੇਵਾ ਮੁਕਤੀ ਦੇ ਸਮਾਰੋਹ ਦੌਰਾਨ ਮੰਚ ਤੋਂ ਸਮਾਜ ਚਿੰਤਕ ਸਵਰਨ ਟਹਿਣਾ ਤੇ ਬੀਬੀ ਹਰਮਨ ਅਤੇ ਮਸ਼ਹੂਰ ਲੋਕ ਗਾਇਕ ਰਣਜੀਤ ਮਣੀ ਨੇ ਦਿੱਤੀਆਂ। ਗੁਰਦਾਸ ਮਾਨ ਦੇ ਸ਼ਾਗਿਰਦ ਅਮਰਿੰਦਰ ਬੌਬੀ ਨੇ ਅਪਣੇ ਸੁਰੀਲੇ ਗੀਤਾਂ ਰਾਹੀਂ ਕਈ ਘੰਟੇ ਚੰਗਾ ਰੰਗ ਬੰਨਦਿਆ ਹਾਜਰੀਨ ਕੀਲੀ ਰੱਖੇ। ਅਖੀਰ ਵਿੱਚ ਅਮਰੀਕ ਸਿੰਘ ਵੱਲੋਂ ਸਾਰਿਆਂ ਦਾ ਖੁਸੀਆਂ ਸਾਂਝੀਆਂ ਕਰਨ 'ਤੇ ਧੰਨਵਾਦ ਕੀਤਾ ਗਿਆ।
